مسمار جحا

**M:M** الثلاثاء سبتمبر 15, 2009 3:57 am

ويجعله عامر

محافظ الجيزة فرحان بالشباب اللي نزل يلم الزبالة .. حاجة كويسة ..وبالمرة نريح البهاوات في شركات النظافة واهي فلوس الزبالين مدفوعة والشركات بتلم فلوسها من فواتير الكهربا وكله فرحان ..ويجعله عامر

ليلى مراد

ولاد اللذينة بتوع مسلسل ليلى مراد مش عارف ازاي قدروا يخلوا الممثلة بطلة المسلسل سبحان الله الخالق الناطق .. شادية

الشركة المصرية للاتصالات

السيد عقيل بشير رئيس الشركة المصرية للاتصالات يتهم شركات المحمول بحرق الاسعار لتخفيض قيمة المكالمات ويصفها بأنها ليست في صالح المواطن .. أمال رفع السعر بأثر رجعي وزيادة قيمة الاشتراك والاحتكار هو اللى في صالح المواطن يا سيد عقيل؟

سؤال

الحكومة اعلنت منع الاعتكاف في المساجد خوفا من انفلوانزا الخنازير وفي نفس اليوم اعلنت - الحكومة برضه - عن تنظيم حفلة لمحمد منير في الاوبرا هايحضرها 50000 مشاهد .. هم دول محصنين ولا دوكها اللي عيانين؟

هبوط

انا يا جماعة قلقان ان الحكومة تطلع تبرر الهبوط اللي حصل في باب الشعرية وتقول ان باب الشعرية جالها هبوط عشان كانت صايمة وما اتسحرتش

اذا وعدت اوفت

وعدت الحكومة المواطنين بمراعاة الدقة عند اختيار الحروف العربية المكتوبة على لوحات السيارات الجديدة بحيث لا تسيء إلى مالك السيارة، واليكم نماذج رأيتها بعيني لـ ط خ، مـ د ب ، هـ ف أ ، ر م ا ، ع ر ا .. فعلا الحكومة إذا وعدت أوفت

اشمعنى المنتخب

الجماهير المصرية بتطالب برخصة للافطار يوم مباراة المنتخب مع رواندا مساواة باللاعبين .. لانهم مش هيعرفوا يشجعوا من غير شتيمة ودى برضه مهمة وطنية

انفلونزا الهدوم؟

احلى حاجة فى رمضان السنة دى ان العيال لما تطلب لحمة اقولهم بلاش عشان الخنازير ولما بيطلبوا فراخ اقولهم بلاش عشان انفلونزا الطيور وباقى الاكل مقدور عليه .. لكن اللى قلقنى حاعمل ايه فى هدوم العيد والمدارس .. هو مفيش انفلونزا الهدوم؟

معاملة اليهود

فرحنا جدا باخبار تركيب الغاز الطبيعى فى مناطق كثيرة .. الحمد لله اخيرا الحكومة عاملتنا معاملة اليهود.

ربنا يهدي الحكومة

الايام دي الدنيا صيام ومش ناويين نجيب في سيرة حد عشان منخدش ذنوب .. بس يارب المسئولين ربنا يهديهم وما يعملوش حاجات مستفزة عشان نعرف نكمل الشهر الكريم ده مع بعض على خير .. كل سنة وانتم طيبيبن ورمضان كريم

ليه يا بلدى

بعد العناء والبهدلة روحت بيتي وبفتح التليفزيون عشان انسى همومي واتفرج على ماتش الفريق اللى بحبه لاقيتهم بيقولوا مش هانذيع الماتش عشان ازمة البث .. ليه كده يا بلدى ده .. انا حتى والله عملت كل اللى بيقولوا عليه .. شربت من نيلها وجربت اغنيلها

المصري معروف بقوته و جبروته

احنا اللي خطفنا القراصنة .. ده مش اسم فيلم جديد .. ده وصف للي عمله الصيادين المصريين .. فروا من القراصنة الصوماليين وكمان أسرو 8 منهم .. وعلى رأي هنيدي .. المصري طول عمره معروف بقوته وجبروته ووثيق من الفوز